دەنگێ ڤەشارتی

من بریار دابوو، هەر ژ دەستپێکا مێشکێ من زانی هزر بکەت، کا من چ ژ ژیانێ دڤێت و نەڤێت. دەنگێ بلند، دەنگێ سەرکەفتنێ بوو ل سەر هەر دەنگەکێ دگووتە من تو نەشێی !

ل سەر تەرمێ، شیشێ چایا من یا بێ شەکر عەردێ بێ رەنگ خەملاندبوو، دارا هنارا ل بەر سینگێ من، هنارێت بچویک یێت نەگەهشتی وەکی زاروکا حەواندبوون. بەلگێت هنارا، سورەکێ شورەشگێری د ناڤ کەسکێ بەلگا دا رەنگ ڤەددا، هەر وەکی مێشکێ گەنجێت شورەشڤان، ل بەندا ئازادیێ بوون ژ زنجیرێت زاروکینیێ. من ب ئارامی سەحدکرە سەمایا وان د گەل بایێ پاییزەکا ل بەری وەخت هاتی، هزرێت من ژی سترانێت شورەشگێری د گەل هنارا د گووتن. ئەز دێ خوینم، دێ بسەر کەڤم، بمە نوژدار، و جیهانێ چ نەخوشی تێدا نامینن، و هوسا، چ رێکێن دی ل بەر چاڤێن من نەبوون !

ساڵ دەرباز بوون، هنار پاییزەکێ هاتبوونە بەری، دادێ سەلکەکا بچویک بربوو بنێ دارێ و تژی دکر ژ هنارێت گەهشتی. ئەز گەهشتوومە ئارمانجەکێ، بەلێ ئەو هنارە یا دارا نوژداریێ نەبوو، ئەز یا ل باخچەکێ دیتر هنارا د چنم، بەس پا ب راستی، ئەڤ باخچە ژ راستی ژی ئەو جهە یێ دڤێت لێبم.

هەر چاوا بیت، شورەشێت هنار و هژیرا، پاییزا من یا نوی یا تژی کری. بەرهەمێ وان یێ ترش و شرین، تاما پاشەروژەکا هەمەرەنگ ددەن، ئەز دێ کیڤە چم ژ ڤێرێ؟

دەنگەکێ هەی، گەلەکێ دویرە، کەسەکێ بچیکوک ل نهالەکا کیر یێ هەوار دکەت و ئەز ب تەعداری گولێ دبم. وەکی همهمەکا لاوازە، دگەل لڤینا لەشێ ڤی مروڤی ناگونجیت. ئەو ب لەشێ خو یێ چیروکەکا ب هێز دبێژیت، بەلێ دەنگێ وی وەک حەوارییەکا بلند و بێزار یا وەکی وان حەواریێت ژ حەفکا مروڤی نادەرکەڤن ل دەمێ ئەم خەونەکا نەخوش دبینین، نا گەهیتە گوهێت من.

د گەل هندێ کو ئەز هەردەم یا ل بەر مەترسیا راوەستیایم ب وێرەکی، بەس ئەڤ دەنگە، ترسەکا مەزنتر ژ وێ یا ئەز دزانم ددەتە من. من دڤێت کارێ خو بکەم، د ڤان چول و چیا و نهالا دا بچم، ب نێزیکی گوهداریێ بکەم، چایەکا ل سەر پەلا د گەل دانوستاندنەکا درێژ دگەل ڤەخووم، بەلێ هەر وەکی ئەڤ مروڤێ بچیکوک، هەیبەتەکا ژ کێشا خو مەزنتر یا هەی، ترسەکا سەیر ل دەف من چێدکەت. ئەز حەتا راددەکی دزانم بوچی، ئەز دزانم ئەو دەنگێ هندەک راستیا یە، دلێ من یێ ئامادەی گوهداریا وان نینە…