سحبەتەکا هەما هوسا

هندە هند گووتن چەرخێ لەزاتیێ یە، مروڤا ژبیر کر مروڤ بن !

مروڤێ هێدی دچیت، ئێدی وەکی وێنەکێ راوەستیایە د ڤیدیویەکا چار جاری هاتیە ب لەزکرن دا، ئەڤە هەمی بوچی دبەزن ؟ کا دا بکەینە سیچێت هندەک تشتا، دا وەکی مروڤ خو ژ گونەهباریێ دویر بکەین.

کاپیتالیزمە ؟ مروڤ یێ هێدی هێدی دبیتە بونەوەرەک کو پارە خودانێ وییە، ئەو خودانێ پارەی نینە. ئەگەر تو کار نەکەی، پارەی نە ئینی، تە ب سەدەها دەنگێت هەین دبێژنە تە تو بکێر ناهێی. خێزانا تە، تەلەڤزون، سوشیال میدیا یا مروڤ ئێدی پتریا دەمی ل سەر دبەن، ریکلامێت د بەر فیلم و ڤیدیویێت تو ئونلایین تەماشە دکەی، هەمی ب کومڤە دبێژن هلو ب لڤلڤە، بلا خولەکەک ژ ژیانا تە نەچیت و تو چ نەکەی، تو یێ فاشلی، دێ مینیە پاشکەفتی… د بەر ئامان شیشتنێ را ؟ گوهێ خو بدە پودکاستەکی دا دەمێ تە ب هەروە نەچیت. د بەر خوارن چێکرنێ را ؟ خو فێری زمانەکی بکە دا دەمێ تە ب هەروە نەچیت. دەمێ سپێدێ ژ خەو رادبی ؟ گوهێ خو بدە ڤیدیویێت تەحفیزی دا باش کار بکەی. بەری تو بنڤی ؟ گوهێ خو بدە چیروکێت سەرکەفتنا خەلکی د بزنسێ دا، دا تو ژی فێر ببی و وەکی وان بکەی. هشیار بی، خولەکەکا ژیانا تە نەچیت ب بێدەنگی، دڤێت هەردەم کار بکەی دا پاشڤە نەمینی، دا جی کلاسا بکری و ل سەر لێڤێت گزیرتا ل هەوایی بگەری 😌 !

نە راستێ، خەلەتی هەلبەت فێمێنێزمە ؟ ئەڤ ژەهرا هاتی، دبێژیتە ژنێ نابیت تو بەس کارێ مال بکەی، دڤێت تو یا ئازاد بی، ئەگەر د ڤی چەرخی دا، تو بکێر ناهێی ! کا راست، بەس ئەو ژی هەر بو بەرژەوەندییا کاپیتالیزمێ یە… نە نە، نە ئەوە.

هەبیت نەبیت، خەلەتی هەمی ژ تەلەفونا و سوشیال میدیایێ یە ؟ خەلکەک یێ خو دکەتە لێبوک، شەرما خو دبەن، ژ کەرامەتا خو د ئیننە خوارێ، بو هندێ دا بناڤ و دەنگ بن و پاشی ببنە خودان پارە. ئاهووو، هەر ئەم هاتینە ڤە کاپیتالیزمێ 🙃

ئەم ژ بابەتی دویر کەتین، کا راست ئەم بوچی هندە ب لەزین ؟ ئەگەر هندەک ب لەز بن کو زەنگین بن، بەلکی ئەو مافەکێ سروشتی بیت. بەس شوفێر ل سەر جادا ب لەزن، خێزان د چنە سەیرانا و روژێ هەمیێ ب لەزن بهێنە ڤە، فیلمەک دەمژمێرەک بیت، خەلک ژ بەر رادبن چنکو ب لەزن، دێ چنە مێهڤاندارییەکێ و زی چن بێژن مە شولەکێ هەی ئەم ب لەزین، دێ خوارنێ خون، هێشتا پاریێ دوماهیکێ یێ ددەڤی دا و چا دڤێت ب لەزن، خوارن دێ رابیت، دڤێت وێ گاڤێ ئامانا بشوون چنکو ب لەزن… بوچی ؟ ما خونە ئەڤە ژی سیچێت کاپیتالیزمێنە ؟

چ حێجەت مان مە نەگووتین ؟

مروڤ گەلەک یێت سەییرن بووین، ل زاروکینیێ، خوشترین دەم ئەو بوو دەمێ مە چایەک ل سەر تەرمێ ڤەدخار، کەس ل هەوارا چ تشتا نەبوو، یا ئارام بوو ! ئەم بوچی بووینە مروڤێت روبوتی یێت بێ هەست، کو ئەم ل باخچەکی ب رینینە خوار بەس هەستێ مە بەرامبەر گولێ بەس وێنەک بیت ؟ چایا مە یا ئێڤارا بەس بو سناپەکی بیت ؟ ئەز زیتر وێنێت سێرانێ بینمە خوار، نەکە ئێکێ دی بەری من وەبکەت !

د ڤێ گێلەشوکێ دا و لەزاتیا کو ئەم بگەهین (نزا کیڤە ژی، بەس هەما بگەهین)، ئەم مروڤ نەمایینە مروڤ… ئەگەر چ بن، هەر ئەمین و هەر ئەم بریارێ ددەین بەردەوام بین.

بەس ئەز بخو هێژ تێناگەهم، بوچی ب لەزین ؟!