ئەو ئەلیسا د ناخێ من دا

ل دەمێ ئەز زاروک، خەونا من ئەو بوو ئەز ژی وەکی " ئەلیس ل باژێرێ سێر و سەمەرا" روژەکێ ب کەڤمە د کورکا کێڤریشکێ دا و سەرپێهاتیا د گەل بونەوەرێت سەیر دەستپێبکەم. ئەز ل حەوشا مالا مە یا بچیکوک د رازام و من بەرێ خو ددا خانیێ مە یێ سەر نشیف و من هزر دکر ئەز ژی یا چوویمە جیهانەکا سێربەندا. من هەڤال ژ ژیانا راستی د گەل خو د برن، هەر بەرەکێ من ب بانی ڤە ددیت گزیرتەک بوو، و هەر دەرزەکا ل بانی دیار دکر ریبارەکێ مەزن بوو و هەر گرێکەکا بچویک، چیایەکێ مەزنێ ڤان گزیرتا بوو. 

لویس کارولێ نڤیسەرێ ئەلیسێ ژی، مروڤەک بوو د ژیانا راستی دا، یا ب تنێ وی ژی کری ئەو بوو کو سەرەدانا ناخێ خو کری و ب نڤێسینا پەیڤا، ئەلیس بوو ئەو کچا من حەسیدی پێ بری.

من ژی چاندکێ خو هەلگرت و بەرەڤ رێکەکا تژی دار و گژ و گیا و مەترسی چووم. تو دزانی، گەشتا بەرەڤ ناخێ مروڤی، ژ کورکا کێڤریشکێ گەلەک ب ترسترە !

ل شوینا بونەوەرێت سەیر، من هندەک کوپیێت سەیر یێت خو بخو دیتن. پیرەژنەکا تژی سەرهاتی، زاروکەکا تژی خەون و ب بزاڤ بو فێربوونێ، سنێلەکا تژی هزر و گەلەک بێ دەنگ، گەنجەکا توڕە و خەموکی… دەهان دەنگ و بێدەنگی یێ د ڤی باژێرێ سێربەند دا، و دیوانا وان وەکی چایخانەکا ل سەرێ کولانکەکا تژی یە.

ئەڤە ئەون، ئەڤە کەسێت من یێت سەیرن ئەوێت دێ لاپەرێت پەرتووکێت من تژی کەن ! ئەڤە ژ وێ زاروکینێ وەرە، ئەز هەردەم د وێ رێکا ب ترس دا د چمە باژێرێ خو یێ سەیر و سەمەران و وان مروڤان د نیاسم… ئەلیسا د ناخێ من دا، هەردەم یا ل ڤان دیوانا فێری ژیانێ د بیت.