١٠ روژێت سەیر

هەر ژ خولەکا ئێکێ ل سەر وی تەختێ بلند، هناڤێت من دەست ب ئاوازەکێ کر. رێورەسمێن تاریبوونێ دەسپێکر، دەرزیکەکێ رحا من و شلەکێ رەنگ ئاسنی پێکڤە گرێدابوون. دا ژ تاریێ ب رەڤم، من لێگەریا پەرتووکەکێ بخوینم، بەلێ پا ب مخابنیڤە وی دەمی، ب تنێ پەرتووکەکا ژ ئەدەبێ روسی د چاندکێ من دا بوو، شەڤێن سپی، ناخێ من برە جهەکێ تاریتر. دەمێ وێ خواندنێ نەبوو، ئەڤ ئەژدەهاکێ رەش، بایەکێ کەل ب هناڤێت من دا بەردا و کا چاوا ناخێ من د کەلی، وەسا عەورەکێ رصاصی خو ل هنداڤ سەرێ من کوم کر. ئەز ب هەمبێزا وێ عەوری د خەندقیم، بەس خلاس، وی مالا خو د ناڤ خەلەکێت پرچێ من دا ئاڤا کر.

ئەز کەتمە د زیندانێ دا، ئێدی ڤی عەوری شفشێت خو ل دەور و بەرێت من دانان. هیڤی نەمان، چنکو ئارمانج قورتال بوونە ژ ئەژدەهایەکێ مەزنتر، ئەو بونەوەرێ ترسناک ئەوێ د گەدا من دا چێبووی، دڤێت بکوژم، کوشتن ئەڤ جارە، ب تنێ ئەو، قورتالبوونە ! بەلێ پا ئەڤ ئەژدەهایە، نە هەر ئەژدەهایەکە، ئەڤە نا هێتە کوشتن. من پێنووسەک هەلگرت و ب هەمی جرعەت ڤە چوومە شەری د گەل کاغەزا، من نامە بو ئەژدەهاکی نڤێسان. ل روژێن ئێکێ، من گەلەک ب جوانی ژێ داخواز کر وەغەر بکەت، من سوزا رێزلێنانێ بو دا، ئاهەنگەکا مەزن، خوشتڤیێت وی، کەسێن مەزن… بەس هەر وەکی چ نە ! کاغەزێت من د ئاگرێ خو دا د سوتن، دیکێلا وان ئەز پتر خەندقاندم.

هەر روژەک دەرباز دبوو، نامێت من توندتر لێدهاتن، بەلێ ئەوی، ژ ئیرادا من رژدتر، هەر دسوتن، باوەرناکەم هەر جارەکی ئەو نامە ڤەکربن، خواندبن ژی. بەلێ ب دلەکێ وەستیای ڤە، من بەردەوام نامە هنارتن.

پشتی چەند روژا و ژ نیشکەکێ ڤە، ل سپێدەکا خیسارگرتی، ل دەمێ من چاڤێت خو ڤەکرین، عەورێ مە بەرزە بوو. و ل دوماهیکێ ! من د دلێ خو دا گووت، هەلبەت ئەژدەهاکی یا وەغەر کری. بەلێ پا ب مخابنیڤە، ل دەمێ گەهشتیمە جهێ ئەژدەهاکی، ئەوی هەمی تشت یێت تالان کرین، چ نەمایە. نە بیرهاتن، نە نامە، نە پەرتووک، نە ستران، هەر هەمی، هەمی ئەو ژیانا بەری نوکە، یا د دیکێلا ئاگرێ خو دا بری.

مانێ من گووت، ئەڤە نە هەر ئەژدەهایەکە، ئەڤە ئەوە. ئەوە یێ ب دیف دلێ خو دهێت، ئاگرێ خو ژ هناڤێت مروڤی هەلدکەت و وی دەمی دچیت، ب تنێ وی دەمی، دەمێ دزانیت هەمی پارچە ب جوانی، ب تمامی، هاتنە سوتن.