گەشتەک بو باژێرێ نمومەی بوونێ

ل سەر لێڤا جادێ راستیام، دەستێ من یێ چەپێ چانتا من یا تژی یا گرتی و دەستێ راستێ یێ د بەریکا من دا. ئەز یا ل باژێرەکێ بیانی، پاسەک یا ل جهێ خو راوەستیایە ل هیڤیا مروڤان کو سیار ببن، و ل لایێ وێ یێ راستێ شاشەکا بچویک یا هەلاویستیە، دبێژیت خولەکەکا دی دێ پاس دەتە رێ. کەلەکا گریێ یا د حەفکا من دا، نزانم ژ بەر هەبوونا منە ل ڤی جهێ بیانی، یان ژی ئەو هەمی خاتر خاستنن یێن من دوهی کرین. چاڤێن خوشتڤیێت من یێت تژی ئازار، وەکی کابوسەکی د هندەک چرکا دا یێ سینگێ من تژی دکەن. ئەز ب لەز بەرەڤ پاسێ ڤە چووم، بەس ئەو پێنگاڤە گەلەک ل سەر پێت من د گران بوون. هەتا من چانتە دانایە جهێ وێ و رینشتیم، چاڤێ من ب شاشەیا د پاسێ دا کەت، ئەز دێ ١٥ خولەکێن دی گەهمە بنەجهێ.

مێشکێ من د خولەکەکێ دا ئەز زڤراندمە رینشتنا من ل سەر خانکێ نانی، ئەوێ من ل شەڤێت قوتابخانێ بخو دکرە مێزا خواندنێ. بێهنا لەمپا گازێ دفنا من تژی کرن، ل بەر وی چراکێ بچویک، کچکەکا بچویک ل بەر پەرتووکێت خو خەونێت مەزن ئاڤادکرن.

لڤینا پاسێ ب مەرەما چوونا بەرەڤ بنەجهێ، زنجیرا هزرا قەتاند. چاڤێن من یێن تژی رێزێن دار و باری و مروڤێن د قەهوەخانا ڤە و روندکێت خەریبیێ بووین. هاتە بیرا من چاوا ب شەڤ، من خو ل بەندا هەمیا دگرت کو بچنە باژێرێن خو یێت خەونا، دا ئەز ئەلەمتریکەکێ ژ سەر مێزێ ببەم، ددەستێ راسێ دا ب هەلگرم و ب دەستێ چەپێ پەرتووکێن کولیژێ ب خوینم. شەڤێ سێربەندیەکا تایبەت بو خواندەڤانا یا هەی، مێشکێ من وەکی ئیسفەنجەکی هەمی پێزانینێن خو وەکی دزیکەرێت شەڤێ ژ پەرتووکا د دزین…

ئەم ل جهەکێ راوەستیانا پاسا راستیاین، هندەکێن دی سیاری پاسێ بوون. پیرەژنەکا پرچ سپی ژی سیار بوو، چانتەکێ ب رەنگێ سوڕیێ د دەسەتی دا و چاکیتەکێ قەهوایێ تاری بەژنا وێ هەمی خەملاندبوو، سوڕاڤەکا سوڕێ تاری، وەکی گول محەمەدەکا تەمەن مەزن، لێڤێت وێ یێت زراڤ نەخشاندبوون. ب شانازییەکا تایبەت روینشتە خوار، هەر وەکی هەر مییەکێ سپی یێ پرچێ وێ چیروکەکا ژ هەژی سەربلدنیێ یە. بیرا من هاتە وان شەڤێن دادێ د هاتە هنداڤ سەرێ من، ئەلەمتریکا دی د دەستی دا، کەفیکا وێ یا سپی ل سەر سەری وەکی بەفرێ د تەیسی و برهێت وێ یێت تێک چووی، ب دەنگەگێ نزم، توڕە، بەس تژی دلوڤانی دگووتی: ما نە بەسە دادێ ؟ دێ چاڤێت خو خراب کەی ئەز گوری !

ئەم گەهشتینە بنەجهێ، دەنگێ لڤینا مروڤا بەرەڤ دەرگەهێت پاسێ جلفەک ل من دا. نزا بوچی، ل ڤان خولەکا، مروڤ وەسا ب لەز دکەڤن، دێ بێژی مرن یا ل بەر دەری و ئەگەر نەبەزین، مرن دێ چینگێ دەت و ژیانا وان دێ ب دوماهیک هێت.

ئەز گەهشتم، بەلێ ئەز ل کیڤەمە ؟ ژورەکا بچویکە، تەختەکێ لێ، دێ بێژی مریەک بەری نوکە هەمبێز کربوو. مێزەکا هشک یا خواندنێ یا د قولاچێ دا، ئەز باوەرم ب دەهان نڤێسەران ل وێرێ کاغەز یێت تژی کرین و هاڤێتینە د سەبەتا گلێشی دا، د ڤێت من خانکێ دادێ ئینابا، دا من ئەو ئیلهاما تژی بێهنا ئاری و گازا د لەمپێ دا نیشا وان دا با… پێلەکا سەرمایێ ب ناڤ چاڤێت من کەت، ئەڤێ ژورێ، سوپا دارا یا مالا ماموی ل گوندی ئینا بیرا من، نە چنکو تشتەکێ وەکی وێ ل وێرێ بوو، بەلێ پا هندی هند یا دژی وی هەستێ گەرمێ بوو یێ من ژ چایا ل سەر سوپا دارا ددیت.

ئەڤە ئەز هاتم، د بێژنە ڤی، باژێرێ نمونەی.

بەس ب تنێ هەتا ئەز گەهشتیمێ من زانی، کو ناڤێ باژێری وەک پێکەنینەک یێ هەلبژارتی، چنکو هەر تشتە بەس نە نمونەی !

بەلێ پا ئەڤەیە، ژیان ب ڤێ نە نمونەیێ ڤە، دێ بیتە ئیلهاما وان پەرتووکێت دێ ژ نیڤا ئەندێشێت د مێشکێ من دا ژ دایک بن !